sabato 16 settembre 2006

Internet

Un fortuna del empleatos Nokia es le possibilitate de obtener gratuitemente alicun cosas utile pro le labor: computatores e accessorios electronic, telephonos, bursas, CD e DVD, cursos linguistic (pro exemplo illo de finnese) e un rapide connection internet domestic. Io ha inviate le requesta del connection internet pro mi appartamento un septimana retro, si tosto que io me ha establite in illo; ma infortunatemente “ rapide connection internet” significa solmente que le datos passara rapidemente, e non que illo essera activate rapidemente! Le tempore necessari pro le activation es estimate in 3-4 septimanas; io non pote comprender perque il es necessari tanto tempore ma anque si io eventualmente lo comprende isto non va cambiar le facto... Le sol cosa que io pote facer es communicar vos iste information, assi que vos comprende perque io non actualisa mi blog regularmente — e, sperabilemente, me excusa. P.S. Pro tote illes qui, in leger le paragrapho initial, ha pensate que io pote ordinar material gratuitemente a lor beneficio: cancella le paragrapho e oblida lo! Tote le cosas que on ordina debe esser approbate per le capo-officio e mesmo si ille es le sympaticissime Alexander (alias Sasha), isto non significa que toto es permittite.

Etichette:

Minä en puhu suomea

Le curso de finnese ha initiate! Iste septimana io ha habite mi duo prime lectiones, insimul con altere collegas del Nokia. De facto le curso initiava al initio de septembre, ma io e Zeeshan nos ha inscribite solmente ora e ha perdite le prime sex lectiones. Nulle problema! Nos es confidente que nos pote recuperar le tempore perdite, con un poco de effortio. Pro isto, hodie io ha comprate duo dictionarios, uno portabile (io nunquam me movera del appartamento sin illo!) e uno plus grande pro mi studio. Io nunc debe facer le exercitios que le maestra nos assignava pro le septimana veniente — illa es multo sever!

Etichette:

lunedì 11 settembre 2006

Photos de Pasila

Io ha addite alicun photos de Pasila (le burgo de Helsinki ubi io vive) in le Galleria de imagines. Io ha etiam addite altere photos in le albums Helsinki e Curiositates. Reguarda los e lassa tu commentos!

Etichette:

domenica 10 settembre 2006

Missa in… latinese?

Como io me promitteva de facer, hodie io me ha eveliate de bon hora (i.e. 8:00, pro illes qui non ama le theoria del relativitate) pro participar al missa dominical in le cathedral de Henrikin del horas 9:45, que es celebrate in latino. Ma in le vita non toto functiona perfectemente e mesmo le operationes plus banal pote absconder alicun imprevistos que los rende difficile, a vices etiam impossibile. Pro exemplo, que le tram non passa: un folietto pendite al fermata del tram informa que hodie e deman le tram numero 7 non essera in servicio, e que on pote attinger le centro del citate per usar alicun combination de bus e tram. Ben! Io me fide al sorte e prende le prime bus que passa. Le fortuna me adjuta, e continua a adjutar me in le cambio sequente, fin que io arriva al cathedral — con dececinque minutas de retardo in respecto al initio del missa, ma io es comocunque satisfacte de mi fortuna e entra in le ecclesia. Pauc personas sede in le banco, e le composition del gente pare plus europee que le septimana passate. Il es le momento del predication. Le prestre sta e parla, parla in... francese?? Ben que io ha studiate francese in le schola, io admitte francamente que io non lo parla, ni es capabile de comprender un francese qui parla. Le prestre es un pauco ancian, e isto non facilita mi tentativas de comprension. A un certe puncto del predication, io crede de audir alicun parolas in anglese. Io tende mi aures, synthonisa mi cerebro sur le undas del lingua anglese, e succede in captar alicun altere parolas. Si, illo es anglese, sin dubita. Ma illo es un anglese parlate da un francese e, como io ha scripte alicun lineas supra, io non es capabile de comprender un francese qui parla! Excusez moi. Al fin, le lithurgia esseva mixte: le partes recitate esseva in latino, e le alteres in francese e franglese. Io debe nunc considerar attentivemente que facer le septimana proxime; io sape que il ha un altere ecclesia catholic in Helsinki, forsan io va visitar lo. In le via del retorno, in le tram io sede proxime a un copula de seniores ancian de aspecto asiatic; de lor parlata, io comprende que illes es corean. Io es multo attracte per tote coreanos, io volerea dicer les que lor cinema es le melior del mundo, que Kim Ki-Duk es le melior director de tote tempores, que Choi Min-Sik es le melior actor, que tote actrices corean es bellissime, que io volerea irritar me como solmente illes sape facer, que Old Boy es le historia de mi vita, etc. etc. Ma forsan il non es opportun. :-) A un certe puncto, le senior (ille habera al minus sexanta annos) me demanda, in anglese, como attinger un certe ecclesia. Io cerca le adresse in mi mappa, e le dice que ille deberea dismontar del tram al fermata veniente. Ille comprende, e me regratia. A iste puncto, io non pote retener me del demandar ille (io jam lo sapeva, ma isto es un trucco pro initiar le conversation): “Are you Korean?”. Ille non menti, e in le medie minuta de tempore que nos remane, io le dice que io ama le cinema corean, especialmente Kim Ki-Duk; ille comprende e me repete le nomine, assi que io nunc sape qual es le pronunciation correcte (isto va remaner secrete :-) ). Ille sembla contente de mi interesse; me demanda de ubi io veni, me demanda si io ha essite in Corea, e me dice que ille ha essite in Italia. No, io non ha essite in Corea. Pro le momento...

Etichette:

sabato 9 settembre 2006

Incontro con Greta

Circa un septimana retro, io trovava in Skype un italiana qui vive in Finalndia, e ha initiate a chattar con illa. Illa se appella Greta e vive in Helsinki desde un mense, ubi illa labora pro su doctorato in biologia. Nos ha excambiate nostre numero de telephono, e hodie nos nos ha incontrate presso le monumento a Sibelius — le loco que tote touristas qui veni in Finlandia veni a vider; io non mesmo lo ha photographate. :-) Nos ha promenate in le centro, ubi nos ha mesmo incontrate mi collega Simone con su fidantiata (io non memora le nomine), Davide (un altere italiano qui labora in le sede del Nokia in Espoo) e un altere amica, qui forsan se appella Anna, ma forsan non. Le feminas esseva finlandese, ma le fidantiata de Simone parla italiano perfectemente. Postea io e Greta ha cenate in un fast food (non McDonald!), e ha retornate cata uno per su strata. Ma, infortunatemente, mi strata esseva bloccate per le policia qui controlava un folla de manifestantes (e curiosos) circa alicun incontro politic europee que se teneva ille vespere in Helsinki (non demanda me qual incontro — io non lege quotidianos e non reguarda le television, supertoto si illos es in finnese!). Al fin, post attender un medie hora con le sperantia que le policia nos permitteva de passar, io ha decidite de retornar in Pasila per le traino; isto ha functionate, e post un quarto de hora io esseva de novo in mi appartamento.

Etichette:

giovedì 7 settembre 2006

Code camp, 2

Iste ha essite mi tertie e ultime die in le code camp; deman io non potera participar perque io essera ingagiate con le relocation al appartamento: io va signar le contracto, e sperabilemente io va mover me ibi in le mesme die. Ma super isto, io vos informara in le dies sequente. Como io vos preannunciava, heri e hodie io ha essite le phantasma de Zeeshan: io sedeva proxime a ille, reguardante lo que ille faceva e, aliquando, io le demandava explicationes. A vices io mesmo le corrigeva; alora ille me ha dicite "Si, il es un bon idea que tu sede hic!" — io me senti honorate. :-) Pro me, le code camp ha essite le occasion pro vider in action le prototypo del successor del Nokia 770, que es — como io al fin ha discoperite — le producto con le qual io laborara in le menses veniente. Iste nove Internet Tablet es totalmente coperite del secretos industrial, ergo io non pote revelar vos ulle information; ma io crede que io pote dicer vos que io esseva favorabilemente impressionate. Al fin del die laborative, nos ha consummate un sauna; illo esseva le prime sauna pro me, e io crede que io ha superate le proba con successo. De facto, io debe admitter que io me expectava alique ancora plus extreme, plus fatigante e choccante; ma si io lo compara con un cursa (o un altere activitate physic demandante) de medie hora, io trova que le sauna es multo "soft", in le senso que illo non stressa le physico, e que on poterea repeter lo durante tote un die sin fatigar se. O, al minus, iste ha essite mi prime impression. Un altere cosa a dicer, es que le respiration non es sempre facile, a causa del elevatissime temperatura del aere. Io es gaudente de haber probate le sauna in compania; e post que nunc io sape que illo non es un cosa tanto terribile como io timeva, io potera etiam entrar in sauna sol — si con le appartamento io habera accesso a un. Infortunatemente io non ha altere photos de iste dies a monstrar vos; ma Zeeshan e Naba ha capturate alicun photos e in le septimana sequente io va demandar les an illes vole condivider los con me. :-)

Etichette:

martedì 5 settembre 2006

Code camp

Le code camp es in plen activitate. Le sol exception es io, qui ancora es un pisce for del aqua. Io ha passate le die in leger tote le documentation que io trovava super D-Bus, FarSight, Telepathy e a sequer como un umbra mi collegas Simone e Naba (io ha discoperite que ille es le autor de anjuta, mirabile!). Deman le victima va probabilemente esser Zeeshan, ma ille ancora non lo sape. Io ha capturate un photographia del code camp, ubi on pote vider como le ver programmatores labora.

Etichette:

lunedì 4 settembre 2006

Al labor!

Hodie il esseva mi secunde die de labor, ma de facto le prime die de activitate intelligente. :-) De facto, venerdi io solmente visitava le palacio del Nokia, quasi como un tourista, e legeva con interesse le informationes presente in le intranet (informationes reservate al empleatos, ergo io non pote dicer nihil re los, non mesmo sub tortura). Ma hodie io esseva productive e installava Debian etch, ancora in version beta, sur un del computatores portabile a mi disposition (duo Thinkpad del IBM — in le altere infortunatemente il ha Windows). Le installation non esseva multo facile, perque un del requisitos de Nokia es que tote le discos debe esser cryptate; e le supporto al cryptation in debian-installer es ancora in phase beta. E, prevedibilemente, il habeva problemas: le procedura de installation non carga le modulo dm_crypt que es necessari pro operar con partitiones cryptate, ergo io debeva cargar lo manualmente. Un altere problema esseva que le partition de swap non esseva recognoscite correctemente, ma un recerca sur google me portava al solution (io es secur que il ha millenas de personas interessate in iste detalios technic). Deman e le die sequente io va probabilemente esser absente de internet: io va a facer compania a mi collegas que iste septimana ha un "code camp" (session intensive e collaborative de programmation) in Espoo, un citate proxime a Sofia. Io spera de poter retornar mercuridi, pro haber tempore de completar le questiones burocratic de mi permanentia in Finlandia.

Etichette:

domenica 3 settembre 2006

Missa dominical

Iste matino io me eveliava post 9:00 (usualmente le lumines del aurora que penetra in le camera per le non-troppo-spisse cortinas me evelia multo antea), ergo un pauco troppo tarde pro participar al missa del 9:45 como io planava. (Pro illes qui pensa que 45 minutas deberea sufficier: istos include un abundante breakfast, le consultation del mappa pro trovar le ecclesia, e le transporto via tram) Al fin, io arrivava al Cathedral de Henrikin pauco post 10 e un quarto. Io non portava mi photocamera, perque le die non esseva tanto solar; ma io habera securmente altere occasiones pro photographar le placia. Lo que il es opportun dicer, es que iste "cathedral" es multo plus parve que le ecclesia de Paese (mi village); multo belle, ma micre. Totevia, illo es plus que sufficiente: al ceremonia del 11 horas il non habeva multe personas, e ancora il remaneva alicun spatios vacue in le bancos. Benque le missa esseva celebrate in finlandese, le maxime parte del participantes non esseva (o non semblava) finlandese: il habeva supertoto asiaticos, con pelle un pauco obscur (philippinos, probabilemente). De facto, io non saperea quante personas ha comprendite lo que le prestre ha dicite durante tote le hora del missa, ma io suppone que illes es minus que vinti. Le proxime septimana, io cercara de eveliar me plus tosto: le missa del 9:45 es in latino, ergo il es probabile que io va comprender al minus le "Pater noster". :-)

Etichette:

sabato 2 settembre 2006

Photomodella

Heri, quando io ha retornate in le hotel post le mangiar, il habeva alicun personas sedite sur sedias in fronte al elevator, e un altere sedite sur le pavimento con un photocamera in mano. Il habeva etiam un umbrella blanc pro illuminar le ambiente, ma io non esseva in un bon position pro vider le subjecto del photographia. In omne caso io debeva attinger le elevator pro vader a mi camera, alora io passava retro le personas e in facer isto io reguardava le subjecto: il esseva un femina e un homine, intra le elevator, vestite elegantemente. Infortunatemente le bellessa del femina me colpava tanto que io oblidava de facer la un photo (de facto, io crede que le altere photographo non lo haberea appreciate). Pro iste ration, vos pote solmente creder a mi parolas, e imaginar quanto illa esseva belle!

Etichette:

venerdì 1 settembre 2006

Efficentia

Le intersection del stratas e del ferrovias ha sempre essite un problema pro omne urbanistas. In Italia le problema ha essite solvite con super/sub passages o, in caso de insufficientia monetari, con un efficiente systema de barras que blocca le traffico stratal 15 minutas ante le passage del traino.
Mi fratre me narra que in Japon on pote trovar mesmo trainos que curre sur ferrovias supra-elevate in respecto al stratas; o, in caso de passages a nivello, le barras blocca le traffico exactemente pauc secundas ante le passage del traino. In Finlandia, le solution es simplemente genial: le traino passa a nivello per le strata, sin ulle barra a bloccar le traffico. Un minuta in avantia que le traino va passar, un sono de campana initia a esser emittite, assi que pedones, automobiles e tote le altere medios stratal es advertite; le libertate individual es sacre, ergo cata uno pote decider si arrestar se o passar. Iste solution es de facto le plus economic. Io non comprende perque illo non ha essite establite in Italia...

Etichette: