domenica 29 ottobre 2006

Suomenlinna

In le galleria del imagines io ha cargate le photos de mi visita al fortalessa de Suomenlinna, que es in un insula proxime a Helsinki. Le dies esseva incredibilemente splendente — ma anque extrememente frigide! Isto es le ration pro le qual in tote le photos io compare con guantos e con le bonetto del Italia. Le altere duo personas que es presente in iste photos es Antonio e Diego, de Brasil. Io los regratia pro lor collaboration in prender le photos! Un curiositate: nos incontrava altere italianos durante le viage, e nos discurreva un pauco. Illes veniva de Borno. Al fin, nos constatava que le mundo es vermente parve, perque nos ha un amico in commun: Luca Ghitti. Ciao Luca! :-)

Etichette:

sabato 28 ottobre 2006

Italian party

Illes qui crede que in Finlandia il non ha multe italianos, illes es in error! Le problema es que le italianos de Helsinki ama concentrar se in le mesme locos del citate, ergo il non es facile trovar les in le ambiente natural. ;-) Simone e Anne (su fidantiata) organisava un "sabbato italian" in lor appartamento. Le data esseva establite ante alicun menses, pro evitar absentias o forsan pro preparar le appetito al degustation del productos del cocina sicilian. Le matino esseva dedicate al preparation del cibo: ravioli e cavati. Io non pote parlar super ravioli, perque illos contine ricotta, que es un ingrediente mortal pro alicun empleatos italian in Nokia (e io pote critar con summe felicitate que IO NON ES LE UNIC!). Ma io es fer de haber contribuite al preparation del cavati in dar los le forma, con un enorme effortio de energias. Il esserea correcte dicer que le maxime parte del labor de preparation del pasta esseva realisate per le feminas (pro le italianos qui lege: "femina" in interlingua non es un termino negative) — ma post que io es intrinsecamente incorrecte, io non va dicer lo. Ravioli e cavati esseva servite con un sauce de tomates e carne de porco (finlandese?) cocinate per Simone. Post le prandio, il esseva le torno del tiramisù de Andrea — excellente! Il esserea interessante saper si Fabio pote preparar lo equalmente ben! ...hint... :-D Contrarimente a lo que eveniva con le miraculo del multiplication del panes e del pisces, in nostre caso al fin del prandio il non restava ulle sacco de cibo in plus. E nos anque habeva discursos profunde e illuminante — ma io non va reportar los hic, perque io dubita que le lectores poterea comprender los completemente. Il ha photos del varie phases del die in le Galleria de imagines. Un breve ma intense video super le preparation del ravioli es visibile in YouTube.

Etichette:

sabato 21 ottobre 2006

JollyDragon!

In un discussion in le forum www.finlandforum.org a proposito de amicitias in Helsinki, alicuno ha mentionate le sito jollydragon.net, que io non cognosceva (estranie!). Io ha visitate le sito de JollyDragon, e lo ha trovate interessante: illo es un sorta de club, multo informal, que ha como objectivo le establimento de amicitias inter finlandeses e estranieros. On pote seliger inter le multe eventos proponite cata die, o mesmo crear noves, e vider si on trova altere personas qui condivide le initiativa. Io ha decidite de partecipar al Weekly Welcome, un serata in un pub del centro, specialmente pensate pro le nove membros de JollyDragon qui vole introducer se e entrar a facer parte del gruppo. Isto esseva mercuridi, in Memphis. Il habeva circa 20 personas; le homines esseva principalmente estranier e le feminas esseva finnese — e multo attractive, on debe admitter. Le incontro esseva multo calorose: Paul, le fundator e le “mente” de JollyDragon es un juvene irlandese con un charactere tanto amical que io nunquam ha vidite in alicun altere persona: ille va a prender (in senso litteral) personas totalmente incognite de altere tabulas del local e les porta inter nos assi que illes face nostre cognoscentia. E, incredibilemente, isto functiona. Io crede que io va participar sovente in lor activitates. Intertanto io ha initiate a facer propaganda pro illes: le poster de JollyDragon jam sta in le sala de café del Nokia.

Etichette:

domenica 15 ottobre 2006

Casino, Romario e altere

Jovedi postmeridie le section de Nokia Osso in le qual io labora habeva un party in le Casino de Helsinki, sin un particular motivation (o forsan il ha un motivation, ma necuno se interessava de illo). Curiosemente le major parte del tempore passava in compania del guida, qui nos portava a vider le varie jocos del casino como si illo esseva un attraction touristic... Ma necuno prendeva photos. Postea il habeva un joco organisate: cata uno de nos habeva 5 minutas de tempore pro jocar al slot-machine, e illes de nos qui faceva le maxime numero de punctos haberea vincite un premio (in ver moneta!). Estraniemente le vincitor non esseva io. Le joco esseva extrememente enthusiasmante, perque toto lo que on debeva facer esseva premer continuemente un button — il non importa quando, tote le joco esseva totalmente casual e le tempismo non importava (!!!). Un ver exercitio pro le intelligentia. Postea, nos vadeva a mangiar in un del plus luxuose restaurantes de Helsinki; le cena costava 70 euros pro capite (ma illo esseva pagate per Nokia), e al fin necuno de nos esseva satiate. Forsan pro esser satiate il esseva necessari pagar 140 euro... E ancora postea, nos saliva in le bar, ubi tote drinks esseva pagate per Nokia; io non es secur que illo esseva un bon idea, perque plure de nos esseva completemente ebrie, e alicuno mesmo non se presentava al labor le die sequente. Ma io esseva inter le 5 personas que resisteva plus (a star eveliate, non a biber!), e retornava a mi casa post 2:00 horas del matino. E obviemente venerdi io esseva regularmente in mi officio a 9:00 horas, quando tote le section esseva quasi completemente deserte. Uh! Ma io ha recuperate le somno in le fin del septimana, non vos preoccupa pro me! :-) Heri (e le prime horas de hodie :-) ) io esseva in un local con mi collegas Kevin (Chinese), Antonio e Diego (Brasilianos). Inter altere cosas, nos ha parlate de futbol e io non ha potite retener me del demandar al brasilianos an Romario joca ancora. Lor responsa me ha surprendite: si, ille joca ancora, ha 39 annos (quasi 40) e ille esseva le melior marcator in le ultime campionato brasilian!!! Le proxime anno ille jocara in Australia, con le objectivo de attinger le considerabile numero de 1000 marcaturas ("solmente" minus que vinti manca ancora). Io non ha parolas pro commentar! P.S.: Io ha cargate in le sito alicun photos que io prendeva in le parco de Linnanmäki le 19 de septembre. Le photos es prendite con mi telephono, ergo le qualitate es assatis monstrose. Vide los hic.

Etichette:

sabato 14 ottobre 2006

Scuriolo!

Iste matino, durante que io sedeva a mi computator (estranie, nonne?) io percipeva un movimento foras del fenestra; io ha reguardate e ha vidite un scuriolo (it: "scoiattolo", en: "squirrel") que saliva sur le arbore del jardin, e se arrestava sur un ramo. Io ha immediatemente prendite mi photocamera e le resultato es iste horribile photo que vos vide hic al latere. Pro facer un photo melior, io ha aperite mi fenestra; ma si tosto que io faceva isto, le scuriolo descendeva del arbore e escappava velocissime sur le prato. Alora, vos debe contentar vos de iste photo. Ma iste non es le prime scuriolo que io vide; io crede que io habera ancora opportunitates de prender altere photos, possibilemente melior. :-)

Etichette:

martedì 10 ottobre 2006

Businessman

E como poteva io viver sin mi carta de presentation? Ora io ha 100 de illos, minus los que io ha jam distribuite a mi amicos e cognoscentias. Io sape que alicuno securmente pensara que io ha initiate a distribuer los a tote le feminas que io incontra in le strata, como si illo esseva un sorta de propaganda; pro iste ration io debe acclarar que isto non es del toto ver — solmente partialmente ver. ;-) Le resto del cosas procede in lor curso natural: al labor io continua a reciper signalationes de problemas super le programma que io mantene, e toto lo que io debe facer es "acceptar" le signalation e specificar pro qual data io pensa de resolver lo. Io sempre pone le data del 43-esime septimana, ma solmente perque illo es le data plus distante que il es possibile selectionar. :-) A illes qui se demanda quando es le septimana 43, io responde que io mesme non lo sape; ma tote le eventos e le scadentias que occurre in Nokia es datate con le numero del septimana &mdash non demanda me perque. Io totevia es felice que le septimanas se conta con un numero e que illos non ha un nomine; alteremente illos esserea 52 parolas in plus a apprender quando on studia un lingua!

Etichette:

mercoledì 4 ottobre 2006

Internet!! E un pauco de Nokia...

Post un longissime tempore e multe impatientia, io ha finalmente un connection internet in mi appartamento! Per favor, invia me vostre congratulationes! Isto significa que in le dies veniente io cercara de actualisar mi blog regularmente, perque io sape que il ha millenas de personas qui vole saper lo que io face. ;-) Le labor in Nokia se revela multo interessante e stimulante. Mi collegas es multo sympathic; le plus proxime es Zeeshan (de Pakistan), perque ille es single como io — ergo nos ha un certe comunantia de interesses, e de tempore libere. In realitate ille ha un fidantiata, ma illa vive in Sancte Petroburgo e veni in Helsinki solmente de tempore in tempore, assi que ille es un “quasi single”. Post que plure personas me ha privatemente demandate alicun informationes circa mi occupation in Nokia, io va reportar hic super lo que io face. Le prime cosa a dicer: mi labor non concerne telephonos! Io labora in Nokia Multimedia, in le sector appellate OSSO (Open Source Software Operations) que se occupa del developpamento de applicationes Open Source. Ancora plus specificamente, mi equipa se appella RTCom (Real-Time Communications) e developpa solutiones pro le communication in tempore real (pro exemplo, programmas de chat con audio e video). Currentemente nos labora con le prototypo de un computator portabile que essera le successor del Nokia 770 Internet Tablet, ma iste prototypo es coperite per le secreto industrial e io non pote revelar ulle detalio super illo. Mi prime impression super mi labor es optime: le ambiente es amical, le horarios de labor es multo flexibile e le labor mesme es multo ingagiante. Pro le momento le rythmo non es stressante, perque il non ha scadentias multo proxime; ma io sape que nos debera completar alicun labores pro le septimana de Natal, e io time que isto significa que io non potera prender multe dies de vacationes in ille periodo (de facto, io non mesmo habera accumulate multe ferias...). Totevia le dies 24, 25 e 26 decembre es dies festive, ergo io succedera a tornar in Italia al minus pro pauc dies. Alora, lectores italian, nos va revider nos in decembre!

Etichette: