venerdì 29 dicembre 2006

Ultime die de labor del anno!

Le retorno in Finlandia ha essite tranquille, a parte alicun problemas minor in le aeroporto: mi spuma de barba, que io portava in mi baggage a man, esseva sequestrate perque illo eccedeva le quantitate maxime admissibile. Isto es a causa del nove mesuras de securitate activate in le aeroportos del Union Europee, que previde que le quantitate de liquido presente in cata contenitor non pote superar le 100 centilitros (mi flacon esseva de 200cl). Benque io non comprende totalmente le senso de iste restriction, io es felice de haber contribuite al lucta al terrorismo. Le altere problema incontrate, es que quando io arrivava in mi appartamento io observava que mi valisa esseva rumpite; fortunatemente non in maniera tal que alicun cosa poteva exir, ma certemente le aqua pote entrar — e io debera considerar iste eventualitate, le proxime vice que io va utilisar le valisa. Le causa del ruptura non es certe, ma io suspecta que le responsabiles es le terroristas qui labora in le aeroportos. Le dies sequente io ha retornate al labor in Nokia, cuje officios es inusualmente vacue: le major parte del empleatos es in vacantia, e le passos del presentes face echo in le corridor — especialmente illos de mi boss. Como consequentia de iste desertification io non recipe ulle signalation de problemas o requestas, lo que, juncte al facto que mi software es in un stadio stabile, implica que io es quasi disoccupate. Non a caso, io ha scribite iste message del labor, quando mi die laborative verte a su termino... De facto, isto es le ultime die laborative del anno 2006 e, cosa ancora plus importante, de hodie io pote esser certe que io es un empleato Nokia a tempore indeterminate: io esseva empleate le 28 de augusto, con un periodo de proba de quatro menses que ha expirate in gaudiose silentio! :-)

Etichette:

domenica 24 dicembre 2006

Patria

Salute, Italia! Post plus que tres menses e medie io ha retornate a mi terra native, ben que pro solmente pauc dies. Le viage de arrivata non esseva perfecte, perque le avion de Zürich a Venetia partiva con quasi un hora de retardo, sin que ulle motivation esseva explicate al viagiatores. Pro insister con le criticas, io adde que le aeroporto de Zürich es governate per un grande confusion, probabilemente causate per le facto que le Suissa non es un pais del Union Europee, e on debe passar le check-in de novo. Del viage sur le Alpes io ha salvate alicun photos perque le nubes esseva tanto dense que illos pareva un terreno coperite per nive, e le summitates del montanias plus alte esseva ancora visibile e ben se integrava in le panorama nivate. Durante mi permanentia in Italia io passa le tempore a incontrar mi amicos e parentes, sin oblidar le ex-collegas de labor. Totes es felice de revider me (o illes finge ben), e io equalmente. In le mesme tempore anque Andrea e Loco (mi fratre e su sponsa) es in Italia, assi que le familia es complete. In Venetia io ha visitate le exposition de arte "Loco", dedicate al talento de Loco; illo non es multo extense, ma le operas merita un visita anque per le personas qui non es familiar con iste typo de arte (alicun exemplos es in le Galleria del imagines). Va a visitar lo!

Etichette:

lunedì 18 dicembre 2006

Brochure de Helsinki

Le officio touristic de Helsinki ha publicate un brochure que es disponibile in plure linguas, includite le italiano. Pro vider le version italian, clicca hic! Postea, veni a visitar me! :-)

Etichette:

lunedì 11 dicembre 2006

Naisu no mori: The First Contact

Heri vespere io ha vidite le film plus estranie in mi vita: Naisu no mori: The First Contact. Illo es un film japonese, que non pote esser classificate in ulle genere cinematographic; illo es un collection de curte historiettas (non sempre sensate), que con le developpamento del film deveni in alicun modo relate — ma non bastante pro dar lo un senso. Alicun del historiettas es normal, realistic; alteres es completemente absurde, e involve creaturas phantastic realisate in computer graphics que pare vermente real. Il es impossibile pro me narrar super iste film, e le unic ration pro le qual io ha scribite iste entrata es pro stimular vostre interesse — ma obviemente necuno lo reguardara, a minus que ille veni in Finlandia pro vider lo. ;-)

Etichette:

lunedì 4 dicembre 2006

Celebritate

E ben, si! Finalmente io ha devenite un celebritate in tote le Finlandia, justo 20 minutas retro! YLE – TV2, un del principal canal televisive finnese, monstrava un servicio integremente dedicate a JollyDragon e pro alicun secondos io etiam appareva in illo. Le filmato es disponibile in Google video, ma solmente mi amicos qui es presente in le video es authorisate a vider lo. ;-) E in un magazin de Oulu, Äijä, il ha un articulo super JollyDragon con photos de un Weekly Welcome e un breve intervista a Zeeshan e a me. Infortunatemente io non ha un copia de iste magazin, ma spera que tosto le articulo sera disponibile in le sito internet de Jollydragon.

Etichette: