lunedì 24 novembre 2008

Le photographo pigre...

...prende photos stante in su terrassa.

Le nive reposa sur le digitos del terra:

(parolas vacue pro un photo vacue)

Etichette:

domenica 23 novembre 2008

Joulukadun avaus

Joulukadun avaus significa “apertura del strata (o via) de Natal” e es un cerimonia traditional que se repete con frequentia annual un mense ante le Natal. Le strata es Aleksanterinkatu (strata de Alexandro, ubi “Alexandro” es Alexandro I de Russia, qui conquereva Finlandia in le initio del 19me seculo) e es probabilemente le strata traditionalmente plus importante de Helsinki; durante iste evento le strata es “aperite” al festositate de Natal, e essera illuminate a festa usque al Epiphania.

Le cerimonia initiava a mediedie in le placia del senato, senaatintori, con le arrivata (per tram) de Sancte Nicola e le discurso de inauguration del burgomastro de Helsinki. A 13:00 horas, un parada de infantes e animales (sia ver, sia ficte), terminate per le carretto de Sancte Nicola, se partiva del placia del Senato e percurreva Aleksanterinkatu, ante le oculos de multe spectatores. Le conditiones atmospheric esseva in perfecte syntonia con le spirito del manifestation, ma non con le electronica de mi photocamera: multe nive e vento, e un temperatura ideal, -3 grados. Nonobstante isto, il habeva un grande numero de personas que luctava contra le adversitates atmospheric pro assister al procession; de facto, io esseva surprendite in veder assi tante personas in le centro. Pro recordar le eventos al posteritate, io protegeva mi camera in un sacchetto de plastica, que io forava in le fundo pro permitter le passage del objectivo; le camera assi esseva solmente poco humide, e le unic problema esseva con le lente, que io debeva frequentemente passar con un panno. Un opera vermente heroic, cuje resultatos vos pote admirar (?) in le album del galleria.

Etichette:

martedì 18 novembre 2008

Qui commanda le politicos italian?

Io publica un intervento de mi jornalista preferite, Marco Travaglio, registrate durante un conferentia. Le filmato initia in le puncto plus humoristic, in le qual ille describe in qual maniera le governamento italian approbava le lege financiari; le filmato es multo longe, e a mi aviso multo interessante (anque in le parte precedente al puncto ubi io lo face initiar, ma alora illo es plus seriose):

Io signala altere videos interessante:

E, in ultimo, io face notar que io ha addite un nove quadro al fundo al menu del barra sinistre (“Articulos interessante”), que es un lista de ligamines a articulos o novas que io ha legite recentemente, e considera interessante. Forsan vos condivide mi interessamento?

Etichette: , ,

Geocaching

In le gruppo local de discussion in CouchSurfing, io ha discoperite un activitate que io non cognosceva: Geocaching. Isto es un neologismo anglese, que on poterea traducer como “geocassa” o “geodeposito”, e es un typo de chassa al thesauro que usa le coordinatas geographic del objecto a trovar. Illo ha nascite circa in le anno 2000 con le advento del receptores GPS (Global Positioning System), que permitte de establir con un certe precision le location de un persona o, como in iste caso, de un cosa.

Il ha multe variantes de Geocaching, ma in le plus simple le joco consiste in retrovar un cassetta (le geocassa) que ha essite positionate in un certe loco, del qual le recercator cognosce le coordinatas de latitude e longitudine. Sovente, iste cassetta non es facilemente visibile, ma es abscondite de maniera que le personas qui casualmente passa proxime a illo non lo pote vider. In le cassetta on pote trovar alicun “thesauro”, como istos:

que on pote prender (e replaciar con altere thesauros pro le trovator futur) e usualmente il ha un pecia de papiro e un stilo pro scriber le proprie nomine e obtener fama eterne. Le maniera plus conveniente pro trovar le cassa es utilisar un receptor GPS, ma si vos non lo ha vos pote simplemente utilisar le servicio de mappas de Google, inserer le coordinatas del geocassa e imprimer le mappa in un papiro (o in vostre memoria, si illo functiona ben).

Como obtener le coordinatas del geocassas? De facto, le responsa a iste question es multo indefinite: quicunque pote crear un geocassa, absconder lo e communicar le location in le maniera que ille prefere. Pro isto, on non pote dar un responsa ben definite: uno poterea scriber le location in su blog, in un magazin, sur un muro pro le strata, in un gruppo de discussion, etc. Naturalmente, il ha anque sitos create exactemente pro listar le geocassas: le plus famose es probabilemente www.geocaching.com, que es anque un registro in le qual le jocatores recorda lor retrovamentos. Obviemente il ha un sorta de competition inter le geocachers, super qui trova le major numero de geocassas. Como io scribeva, il ha multe variantes del joco, qui es limitate solmente per le phantasia del participantes: on pote haber un serie de geocassas a trovar le un post le altere, per exemplo quando le thesauro es le coordinatas del geocassa sequente, o (plus interessante) quando il ha un enigma a solver.

Le passate dominica, con alicun amicos de CouchSurfing, io participava a iste activitate pro le prime vice; nos trovava sex (6, pro le mentes perverse) geocassas, ma non prendeva le thesauros — nos nos contentava de lassar nostre nomines in le “registro del trovatores”. In futuro probabilemente io va a recercar altere geocassas, o anque absconder alicunos nove (suggestiones super qual thesauro io poterea donar es benvenite).

Etichette:

mercoledì 5 novembre 2008

Videos pro passar tempore (e parola!)

Post que in iste dies le labor e le incontros (sempre gradite) con le amicos ha absorbite le totalitate de mi tempore, e post que nulle evento relevante ha occurrite, io non ha vermente nihil a dicer. Ma post que il es essential que io scribe qualcosa in mi blog, io va plenar le spatio con videos.

Le prime video es le Passaparola de lunedi 3 novembre:

(io crede que il es bon que io non lo commenta)
Le secunde video non es un novitate (al contrario, illo es un del plus famose videos in YouTube), e quando io lo videva non pensava a publicar lo in mi blog; ma post que io non habeva ideas super que bloggar, io lo ha recuperate de mi memoria. Reguarda lo, io non vole anticipar alique:

E infin, io nota (sin surprisa) que io oblidava de passar parola le septimana passate: reguarda le video de lunedi 27 octobre.

Etichette:

domenica 2 novembre 2008

Le votos perdite

Venerdi anque le magazin electronic italian Punto Informatico dava le notitia del perdita de 232 votos electronic durante le ultime electiones municipal. Iste 232 votos es le 2% del votos total in le municipalitates ubi le systema de votation electronic esseva usate; benque le percentual non es immensamente grande, in iste typo de electiones le differentia de un o duo votos es sufficiente a determinar le successo o le insuccesso de un candidato, ergo le problema non es ignorabile. Le section finlandese de Electronic Frontier Foundation, jam in Junio 2008 publicava un reporto que criticava le systema de votos electronic de Finlandia, que io arbitrarimente summarisa in le duo punctos que pro me es plus importante:

  1. Le codice del programma de e-voting debe esser public, durante que illo que es usate in Finlandia es mantenite secrete
  2. Le votante deberea haber un quitantia de voto, i.e. un prova que demonstra que su voto esseva recepite e registrate correctemente

Altere criticas esseva mirate al systema de verification del votos, al absentia de un possibilitate de un recalculation confidibile del votos, e al insecuritate del systema, que poterea permitter a un hacker qui accessava le base de datos de cognoscer le voto de omne votante. Tote iste criticas es valide, ma me portava a reflecter super le systema de voto traditional; quanto secur es illo?
Io non sape si le systema de voto es le mesme in omne pais, ma al minus in Italia e Finlandia illo es multo simile: le votante va con su scheda electoral in un cabina, de maniera que ille non es visibile, e scribe le numero de candidato que ille vole votar (o, in le statos non democratic (clicca sur le ligamine pro vider como le stato italian spendeva 50 milliones de euro), marca con un cruce le symbolo del partito que ille pensa esser minus corrupte). Postea, le votante insere le scheda in un cassa, e retorna felicemente a su casa. Ma como pote ille esser secur que su voto essera contate, e registrate correctemente? Le personas cargate de calcular le votos poterea esser corrupte, e registrar le voto a un altere candidato o partito politic — certemente isto essere discoperite si le authoritates commandava un recalculation del votos, ma quanto es isto probabile? Si le calculatores modifica “solmente” le 2-3% del votos, probabilemente necuno va suspectar ulle conspiration! E le situation es ancora plus ridicule in le statos ubi le votantes debe scriber lor selection usante non un penna, ma un stilo de graphite (!!!) que quicunque poterea cancellar con un simple gumma e cambiar le voto al partito que paga plus. Benque tote nos es secur que un tal evento non es realisabile in nostre pais, on non pote negar que le possibilitate theoric existe.

Io pensa que il esserea simple crear un systema de votation qui rende quasi impossibile le alteration del resultatos: le votantes mesme controla lor voto. Il esserea sufficiente que in cata scheda electoral il habeva un parve quadretto, per exemplo de 2cm x 2cm, intra le qual le votante es libere de scriber/designar toto lo que ille vole. Iste quadretto esserea duplicate in un folio de papyro que sta sub le folio original, per exemplo con un technica de papyro de carbon, e le copia esserea lassate al votante, como documento de prova de votation. Postea, in phase de calculation del votos, tote le schedas (o simplemente lor quadrettos designate) es passate per un scanner, e le imagines del quadrettos es memorisate in un base de datos, accompaniate per le numero del candidato seligite in le scheda. Al termino del votationes, cata section publica, in le internet e in le jornales local, le lista complete del votos, ordinate per partito/candidato, accompaniate per tote le imagines del designos. Assi que cata votante pote verificar in le internet o in un jornal si su voto ha essite registrate correctemente, e in caso que il ha errores, ille porta le copia de su scheda electora que demonstra que su voto esseva differente.

Io exemplifica le processo con designos:


Le scheda de voto, a compilar

Le scheda de voto, compilate con le voto e le marca de controlo

Le copia del scheda de voto, que resta al votante como prova de votation.

Le publication del votos, in internet o in un jornal: le votante pote cercar su voto, e verificar que illo ha essite registrate.

Le voto communicate per iste systema continuarea a esser ancora anonyme, e le systema poterea esser perfectionate per non publicar le imagine de controlo integralmente, ma partialmente (per exemplo, a bandas parallel).

E io es certe que ideas multo melior poterea esser trovate, si il habeva le voluntate.

Etichette: ,