venerdì 26 dicembre 2008

Nive a Paese (Treviso, Italia)

Iste matino foras del fenestra io ha potite admirar un poco de nive, cadite durante le nocte.

Etichette: , , ,

domenica 21 dicembre 2008

Quiz bastardissime

Post que fratre Yanello continua a torturar le lectores de su blog con quiz impossibile, anque io ha decidite de proponer vos un question: que es in iste photo?


Clicca pro aggrandir le imagine

Post que io vole ben a mi lectores, anque io da non solmente un adjuta, ma duo:

  1. Le photo es prendite in casa
  2. On pote aggrandir le photo, si on lo clicca

Ma plus que isto, io vermente non pote dicer! Scribe vostre responsas como commentos.

Etichette: ,

sabato 20 dicembre 2008

Correction al sito, pro Internet Explorer

Io vole dicer gratias a un attentissime visitator qui me ha informate super un problema con le layout del sito quando illo es vidite per Internet Explorer (ma qui es ancora tanto folle a usar IE, quando il ha alternativas multo melior?). Io ha corrigite le problema, e como dono de regratiamento io le dedica iste musica:

E pro concluder con un nota scandalistic: qual es le relation inter le author de iste musica, que vos vide representate in su posa typic in le imagine a latere, e mi car fratre? (in ultra al similaritate del posa typic, obviemente!)
Discoperi le responsa hic!

Etichette: , , ,

venerdì 19 dicembre 2008

Un appello

Al italianos solmente: firma l'appello online contro il cambiamento della costituzione ad opera di un parlamento di corrotti!

Etichette: , ,

martedì 16 dicembre 2008

Koti pizza conquire le Est Europa

Durante mi ultime viage a Sancte Petroburgo, io ha apprendite que le finlandese Koti pizza, un catena de pizzerias de qualitate incerte, existe etiam in Russia:

Esque isto va esser de adjuta al humor de Putin, qui pote recordar su melior amico per ordinar un pizza Berlusconi? (Si vos non crede que un tal pizza existe, va al pagina www.kotipizza.fi/Suomeksi/Menu/Pizzat e cerca “Berlusconi” — o ordina directemente uno a Koti pizza!)

Etichette: , , ,

lunedì 15 dicembre 2008

Hermitage

“Finalmente” io ha visitate le Hermitage, un del plus grande museos del mundo, que se trova in Sancte Petroburgo. Le museo es certemente enorme, con multissime salas e operas exponite. On dice (in Russia) que un visita attente e complete require al minus un septimana de tempore. Iste affirmation, unite al facto que le tempore total de nostre visita ha amontate a circa 2 horas e 15 minutas, me induce a pensar que nostre visita non esseva exhaustive.

De facto, nos esseva multo rapide, perque le tempore es danaro e anque perque, pro un oculo non experte e non educate al admiration del operas artistic, un assi grande quantitate de expositiones pote parer monotone e enoiante. Io non parla super me, naturalmente.

Io non ha prendite photographias, perque in general io non crede que photographar operas de arte in le monstras es importante: tote le photos jam se trova in le internet o in catalogos, e probabilemente realisate in un maniera multo melior de lo que io facerea. In ultra, le facto que le photographias in le Hermitage esseva prohibite reinfortiava mi decision. E io es convincite que le decision esseva bon, perque io ha trovate in le internet le photo de mi opera preferite:


Le infante morte sur le delphino — photo trovate in Flickr

E io non necessita ulle altere cosa.

Etichette:

giovedì 11 dicembre 2008

Un exemplo a imitar

Io veni de leger iste nova in YLE news: le Ministro del Education, Sari Sarkomaa, ha decidite de abandonar le governamento pro passar plus tempore con su familia. On scribe que le decision non esseva facile, ma que al fin illa es convincite de haber prendite le decision correcte: le carga ministerial la occupava troppo, e illa non plus habeva tempore a dedicar a su filios e a su marito. Illes ha gaudite de su decision, naturalmente.

Io ancora non es secur si le nova es ver: io ha reguardate le calendario pro controlar si hodie il esseva le prime die de April, ma anque le climate non pare multo primaveril. Le sito de YLE news sembla functionar ben, ergo il es improbabile que alicun hacker lo ha violate e ha inserite le nova abusivemente. E io ha verificate con Google News que anque altere sitos reporta le facto. Io vermente non sape que pensar! Io es confuse.

E a illes qui ha habite le mesme idea que io, io va salvar le perdita de tempore pro un triste information: le ministro italian Mariastella Gelmini non es maritate e non ha filios.

Etichette: , ,

mercoledì 10 dicembre 2008

Le signos del Natal...

Le Natal es proxime. Io lo ha comprendite hodie, retornante a casa, si tosto que io ha aperite le porta:

Le jornal in alto a sinistra non es propriemente considerabile como publicitate, ma si on considera que iste es le prime vice que io lo recipe (sin ordinar lo) e que illo consiste in bon parte (> 50%) de reclamos, on pote dicer que illo es propaganda a tote le effectos. Le revista de Kodin ykkönen, un magazin de productos de arredamento, consiste de 48 paginas de grandor simile a A4, le mesme formato del 8 paginas de kultajousi e del 16 de Kultakello (ambes es botecas de auro e orologios, “aurologios”?), durante que tote le alteres es in paginas A3: DNA (telephonos e connectivitate) 16 paginas, Lidl 12, Bauhaus (ancora productos pro le casa) 16. Tote carta a recyclar.

Benvenite, Natal!

Etichette:

domenica 7 dicembre 2008

Helsinki Scavenger Hunt

Le secunde Incontro Nordic de Couchsurfing eveniva in Helsinki iste fin de septimana, attrahente multe couchsurfers de plure paises: maximemente Finlandia, Svedia e Russia. Ma le participantes, qui es residente in iste paises, non es necessarimente finlandeses, svedeses e russos — un bon parte esseva originari de altere paises, como io. Isto es, per inciso, un aspecto interessante de tote le activitates organisate in Couchsurfing: le varietate de nationes e culturas que se incontra.

Hodie il habeva un Scavenger Hunt, un “chassa al thesauro” como illo que nos habeva in octobre (hic on trova le photos del evento de octobre); nostre equipa, appellate “Sunday” pro manco de phantasia, esseva componite per duo finneses e un americano del Statos Unite. Nos habeva un lista de locos, cosas e actiones a photographar (per exemplo: photographar un membro del equipa qui adjuta un persona casual, photographar un scheleto de dinosauro, etc.) e de questiones a responder (p.e., quante es le pancas blanc in le placia que porta le nomine del architecto qui ha projectate le placia del senato), e un tempore de circa tres horas.

Nostre equipa se classificava al quinte placia, e le tabula complete es:

Koitan ottaa koskenkorvaa51
Lucky 7s40
2nd Grade36
N.S.S.S. Not so sinking ship34
Kasuniteli33
Tribeca33
Sunday33
Be(a)er Huggers32
Cupcake31
Brainfreeze31
Goudse Kaas28
Kurczak26
Forgotten boys26

Le prime equipa attingeva un resultato impressionante, con un grande distantia de tote le altere gruppos. Le le photos official del provas de tote le equipas del Scavenger Hunt es al adresse http://cspics.urssr.com/, e in particular hic il ha illos de nostre equipa “Sunday”.

Le formation del equipas:

Un improbabile karaoke:

Etichette:

sabato 6 dicembre 2008

Lumines de Natal

Heri nocte, al hora quando le robatores exi de lor refugios pro lor aventuras, io anque exiva de mi casa con tote le instrumentos necessari e vadeva pro mi aventura: capturar le lumines que adorna le citate in iste periodo de Natal (como io scribeva, le periodo del decorationes urban initiava duo septimanas retro).

Infortunatemente, in ultra a Aleksanterinkatu, io non trovava multe altere locos adornate. Multe botecas es decorate, ma nihil capturava vermente mi attention, que in vice esseva supertoto dedicate a mantener le distantias inter mi apparatos photographic e le inebriatos qui tentava de retornar a lor casa. Io prendeva plure photos de Aleksanterinkatu, ma quando io los reguardava con calma al computator, io observava que illos esseva totes quasi identic, ergo ha decidite de salvar vos de lor vision.

Benque illos non esseva especialmente decorate pro le Natal, io ha prendite anque altere photos que es in le galleria: le parco de Esplanadi, Tuomiokirkko (le blanc cathedral del placia del senato), le theatro con le pista de patinage sur glacie, le museo de arte classic, un entrata de Kamppi (que io photographava solmente pro non addormir me durante que io attendeva le autobus).

Etichette:

venerdì 5 dicembre 2008

Alicuno in google se interessa in le N800?

Hodie Google ha facite alicun cambios al graphica de su lector de RSS. Post que mi prime impression super le nove graphica non esseva positive, io cercava un maniera pro disabilitar le nove cambios e retornar al apparentia precedente (io vole que vos crede que io faceva un grande recerca, ma de facto il sufficeva facer un click del pagina principal). Le pagina de explication que io fatigosemente trovava contine un interessante imagine de exemplo:

Mi prime reaction, que me ha portate a scriber iste intelligentissime entrata de blog, ha essite: “Alicuno in Google ha un N800 (mi prime filio)!” Ma a un secunde examine on comprende que illo es parte de un lista de etiquettas que es in ordine alphabetic, e probabilemente appare in le pagina solmente per le facto que N800 es alphabeticamente proxime a Musica...

Etichette:

mercoledì 3 dicembre 2008

Ave, Columbo!

Un triste nova: io ha finite de reguardar tote le episodios de Columbo que io comprava un anno retro. Io ha initiate a reguardar le serie Lost, ma anque mi stupiditate ha un limite, e illo non es bastante basse pro permitter me de appreciar iste serie (que succede in crear un athmosphera captivante, ma que pro toto le resto es repellente!).

Per favor, scribe me in le commentos e consilia me un altere serie televisive!


P.S.: vole ben excusar mi auto-adulation, ma io debe signalar que le subjecto de iste post es un duple senso sin rivales.

Etichette: