domenica 18 gennaio 2009

Le campionatos europee de patinage artistic

Le campionatos europee de patinage artistic (appellate anque “patinage de figura”) sur glacie es iste anno organisate in Finlandia, a Helsinki, in le veniente septimana (del 20 al 26 de januario). Pro major informationes e pro le compra del billetos, vide le sito http://www.stll.fi/european_championships_2009/in_english/.

In le sito, e precisemente in iste pagina, on trova listate alicun del stars que participara al competition. Infortunatemente io non crede que le lista es complete, perque tote le nomines listate es finneses; in ultra, il non ha ulle information additional super iste stars, e il non ha un exemplo de lor stilo.
A partial remedio, io pote dar vos un exemplo de patinage in stilo neo-realistic, que un grandissime patinator exhibiva hodie in le ice-rink de Kallio, Helsinki:

Si alicuno vole invitar me como hospite de honor a un exhibition de patinage artistic, scribe me! Le precio va esser grande, ma illo es certemente moneta ben spendite.

Etichette: , ,

lunedì 12 gennaio 2009

Le grande ministros del justitia

In le ultime governamentos, Italia ha habite duo excellente ministros del justitia, que securmente essera recordate in le libros de historia: Clemente Mastella e Angelino Alfano. Mastella es famose pro haber transferite un magistrato que investigava super un question in le qual le ministro mesme esseva involvite, ma es aqua passate (vos pote leger plus super ille in Wikipedia, in italiano e in anglese) perque le nove ministro, Alfano, certemente non es inferior: ille ha demandate al consilio superior del magistratura le transferimento de altere duo magistratos e le expulsion (con blocco del salario) del capo del procura de Salerno, perque le ministro ha judicate que lor investigationes, que illes conduce super le procura de Catanzaro, ubi plure magistratos e politicos es suspectate de corruption, es anormal, mancante de equilibrio e acritic. In realitate, le desiro del classe politic es solmente illo de vilificar le magistratos qui se occupa de casos de corruption de politicos (e de lor amicos), e discreditar le systema judiciari assi que in fin illes es “justificate” in reformar lo. E on ben comprende, que si le governamente Berlusconi reforma ancora le justitia, illo essera transformate in un maniera que illo potera functionar solmente contra le classes social plus debile.
Ma un nova de venerdi passate es que le tribunal incargate del re-examination del requestas de investigation del procura de Salerno ha confirmate que le investigation es justificate e que le investigatores non ha committite ulle irregularitate. E obviemente, iste nova ha essite ignorate per tote le medios de information, a demonstration que le information in Italia es controlate per le regime.

Lo que io ha scribite, probabilmente con plure imprecisiones, es melio explicate in le edition hodierne de Passaparola:

Post que io omitteva de publicar le videos del passaparolas precedente, probabilemente non totes cognosce le historia de iste investigationes. Illos es ben explicate in iste altere editiones (que da un bon quadro del evolution del historia):

Etichette: , ,

venerdì 9 gennaio 2009

Venezia

Le photos de mi vacantias in Italia es disponibile a reflecter le photons de lumine que vos volera dedicar los. Il ha duo nove albums in le galleria, uno super le promenada a Venezia e le altere super le presepio vivente de Santa Cristina1. Altere photos que io publicara in le dies veniente es relative al sojorno in Voltago, un village in le Alpes.

In ultra a poner le photos in le galleria, io los ha anque cargate in mi acconto de Flickr, que io ha desde plure tempore ma que hesitava a propagandar perque io dubitava que io haberea continuate a usar lo. Ma le servicio offerite per Flickr es decisemente valide: in ultra a un commode interfacie pro le vision del photographias, Flickr face abundante uso del tagging (etiquettamento), que permitte le archiviation del photos in un maniera que facilita le recerca, e in ultra consenti le placiamento del imagines in le mappas de Yahoo. Iste ultime operation es totalmente automatic, si le photos jam es marcate con lor latitude e longitudine (cosa que io face gratias al GPS includite in le N810 e a Maemo mapper). Si vos reguarda mi photos de Venezia o le photos del presepio in Flickr, vos videra que in le section Additional Information ha un ligamine appellate “map”; si on clicca super illo, il apparera un mappa con le location ubi le photo esseva prendite (illo indica le location del photographo, e non del subjecto del photo):

In le album de Venetia, assi como in altere albums que io va publicar in futuro, il ha alicun photos que es visibile solmente per mi amicos (perque illos es photo plus personal); pro vider los, on debe crear un acconto Flickr (iste operation es gratuite) e facer un requesta de adder me a vostre contactos, e attender que io accepta vostre requesta (iste operation, in vice, pote resultar multo expensive).


1Le presepio o presepe es un representation del nativitate de Christo. Vide anque le pagina italian de Wikipedia circa le presepe

Etichette: , , , ,

Appello desperate al italianos

Io crede que le utilitate de iste petition es proxime al zero, ma post que isto costa nihil, io vos invita a adder vostre nomine al appello:

http://www.liberacittadinanza.it/petizioni/berlusconi-al-quirinale-mai

...a minus que vos non esserea disturbate per le facto de haber Berlusconi como presidente — anque isto es legitime!

Etichette: ,

martedì 6 gennaio 2009

Proposition pro le nove anno

Mi proposition pro le nove anno es un abundante alimentation con блины, cognoscite anque como lucunculus in latino e pancake in altere linguas:


блины preparate per Юлия

Le objectivo es portar le блины a constituer le 3% de mi alimentation. Ah, pro le ignorantes: блины se pronuncia in maniera simile a “blinì”, ma le secunde “i” ha un pronunciation tanto difficile que io non va mesmo tentar de explicar lo. Quanto al pronunciation de Юлия, isto va remaner secrete.

Quiz

Le responsa al Quiz bastardissime es: vapor. Io plenava un parve olla con aqua, lo portava a temperatura de evaporation, e lo photographava con un brevissime tempore de exposition (1/2000 de secundo). Si on aggrandi le imagine, on pote vider que le guttas de vapor non es immobile, ma se move con grande velocitate. Le calculation del velocitate del motion del vapor es lassate como exercitio al lectores.

Etichette: , ,