venerdì 24 aprile 2009

Presentation de “Promemoria”

Promemoria es un exhibition theatral del jornalista Marco Travaglio; illo es un opera teatral multo atipic, perque de facto il se tracta de lectiones informative que ha como themas le episodios del historia italian recente que non es narrate (o es reportate imprecisemente o partialmente) per le altere medios de communication. Ille usa le theatro pro facer information.

Il ha multe videos in youtube que monstra partes del eventos. Durante le festival del giornalismo in Perugia, Promemoria esseva presentate per Peter Gomez e Travaglio mesme; io lo ha trovate interessante e io vos consilia le vision (nota, cata video dura un hora!):

Bon vision!

Etichette: , ,

giovedì 23 aprile 2009

Geomappa

Iste articulo va esser un pauco technic, alora io es disponibile a pardonar le lectores qui se excusa pro lor ignorantia e non lo lege. ;-)

In le septimanas passate io ha contribuite a developpar osm-gps-map, un libreria open source que consiste de un widget que programmas pote integrar in lor interfacie graphic pro monstrar un mappa (prendite de openstreetmaps.org o de maps.google.com) e interager con illo.
Heri John Stowers, le author de osm-gps-map, ha publicate le version 0.3, que include anque mi contributiones. Iste version porta multe amelioramentos, e in particular me ha consentite de developpar un simple programma que lo usa: geomappa.

geomappa es un parve programma scribite in Python, que mostra un mappa del mundo que le usator pote aggrandir, reducer e mover pro selectionar un area; postea, si on porta alicun archivos JPEG super le fenestra del programma e los lassa cader (drag-and-drop), geomappa scribe le valor del coordinatas de latitude e longitudine in le archivo JPEG mesme, in le section GPS del datos EXIF. Iste operation es technicamente appellate geotagging (on poterea traducer lo in interlingua como “geomarcatura”), perque illo marca le JPEG con le position geographic in le qual le photo ha essite prendite.

Post que un archivo JPEG ha essite marcate per geomappa, alicun programma pote monstrar le photo sur un mappa; per exemplo, si on lo carga in Flickr, on pote vider le photos placiate in le loco ubi illos ha essite prendite: http://www.flickr.com/photos/mardytardi/map/ (iste characteristica de Flickr es normalmente non habilitate: si tu ha un conto Flickr, clicca hic pro activar le importation del information geographic de tu photos)

Illes qui vole probar geomappa lo trova hic. Le programma non necessita installation: illo require que osm-gps-map es installate (anque con le supporto a Python), e le uso es tanto simple que illo non require ulteriores explicationes. In futuro io va crear in le sito un pagina dedicate a illo e un repositorio git. Forsan.

Etichette: , ,

martedì 14 aprile 2009

Le seisma de l'Aquila e le campanias de disinformation

Annozero es mi unic puncto de contacto con le television italian, sia perque le episodios es visibile in internet, sia perque io non cognosce altere transmissiones que poterea interessar me. Le ultime episodio, appellate "Resurrezione", pone al centro del debatto le seisma que le 6 de april ha colpate l'Aquila, e in particular le difficultates in le gestion del emergentia — retardos e inefficientias in le adjutas — e le inexplicabile impreparation del protection civil que ha de facto ignorate le perturbationes seismic que jam existeva desde plure menses in ille region.

Le altere medios de information, efficacemente controlate per le regime, non ha hesitate a criticar Annozero e lo ha accusate de haber offendite le labor del voluntarios qui presta lor adjuta al population (accusation false, post que le unic criticas que emergeva in le debatto esseva al machina organisative). Con le exception del IDV (Italia dei valori, un del partitos del opposition), quasi nulle voce se ha levate pro defender le transmission Annozero e, in general, le libertate de information. Le situation es ben describite per Marco Travaglio in su monologo Passaparola:

Io invita totes illes qui comprende le italiano a reguardar le episodio “Resurrezione” de Annozero e a judicar per lor mesme. Le usatores de Linux pote discargar le episodio con le programma MPlayer, in iste maniera:

mplayer -dumpstream -playlist http://mediapolis.rai.it/relinker/relinkerServlet.htm?cont=po0zfTC8FmAeeqqEEqual

Ma pro concluder con un surriso, io vos lassa con iste photo, un del multissime que on pote trovar in flickr e que me place specialmente.

♥ HEARTquake

Etichette: , , ,

mercoledì 1 aprile 2009

Le evolution de Helsinki

Heri io ha recepite per posta (gastropode) le Kaavoituskatsaus 2009 que, como on pote facilemente imaginar, es le Summario del planification urban 2009: un documento que lista le principal obras de urbanistica que es planate pro iste anno. Pro illes qui vive in Helsinki e non lo ha recepite (esque il ha alicun?), le documento es anque discargabile del portal del citate de Helsinki, como PDF.

Obviemente io non lo ha legite: illo es constituite de 47 paginas scribite in finlandese e svedese e de 1 (un) pagina in anglese, le unic que io ha legite integralmente. Ma con le adjuta del dictionario io ha anque probate a comprender qual es le obras que plus es proxime a mi casa, o al locos que io frequenta abitualmente. Ecce le summario del summario:

  • Le porto occidental, que non es multo distante del officio del Nokia ubi io labora, essera urbanisate: multe appartamentos essera edificate, e le area essera plus favorabile al vita human (vide le photo).
  • Le placia de Kamppi essera renovate, ma io non ha ben comprendite in qual modo. Lo que es certe es que un linea de tram passara proxime a illo, e anque un pista cyclabile.
  • Initio del labores subterranee pro le extension del linea del metro a occidente: le labores deberea initiar al fin del anno (mmm... isto jam es un retardo! On diceva que illos haberea initiate in le primavera!).
  • Station del (futur) metro in Lauttasaari: le accesso principal al station essera construite in le centro commercial a circa 200 metros de mi abitation (illo es un dono special con le qual le citate de Helsinki ha volite honorar me).
  • Creation de un altere area de appartamentos in le sud de Lauttasaari.
  • Un nove linea (de bus, io suppone), pro connecter le centro de Helsinki con le aeroporto.

Pro cata puncto del programma, le numero telephonic del architectos (o gestores del projecto) es monstrate, assi que si vos vole saper plus super ulle cosa, vos pote telephonar les (io es secur que illes va comprender interlingua).

Le sol cosa que non me place de iste communication, es que io lo ha recepite per papiro. 48 paginas a colores, pro cata citatano de Helsinki? Qual guasto!

Etichette: