lunedì 19 dicembre 2011

Generationes passa

Recentemente io ha perdite mi ultime granparente qui ancora esseva in vita, mi granmatre. Nonobstante, io non es triste: io es secur que illa es, como mi altere granparentes, gaudente del Paradiso, e que io ha ancora un sancto in plus que velia super me.

Quando io pensa a mi granparentes, un pensata recurrente, que a vices me opprime, es super le curas medic que illes recipeva: io spera e preca que nostre desperate effortios de salvation non les creava plus de sufferentia. E io sempre pensa que, si un die le destino me rendera sin parolas e expressiones, io vole continuar mi vita con curas natural, sin emplear ulle technologia como alimentation o respiration artificial. Le amor de mi amatos essera le cura le plus efficiente.

Io spera que mi granparentes sentiva nostre amor anque in le conditiones le plus difficile; io, certemente, sempre sentiva lo de illes.

Etichette: ,

domenica 11 dicembre 2011

Time-lapse del Terra del station spatial international

Iste video, que esseva publicate circa un mense retro, es componite per photographias prendite del station spatial international a intervallos regular, ponite in sequentia pro formar un time-lapse. On pote vider le aurora boreal e austral, plure tempestas, e un bellissime panoramica nocturne de Italia (tempore 2:02):

Le nubes pare quasi static perque le station se move velocissime: illo completa un gyro del Terra in solmente un hora e medie — isto es 27.724 kilometros per hora! Iste velocitate es necessari pro mantener le orbita, nam le station es multo proxime al Terra: illo dista “solmente” 278 kilometros. Le imagine sequente (clicca pro aggrandir lo) es utile pro dar un idea del location del station spatial international in comparation con altere satellites artificial, e le Luna:

Altere informationes interessante super le station, es que illo mesura 109x51x20 metros, es permanentemente habitate per humanos desde le novembre del anno 2000 (naturalmente il ha un ricambio del personal, que resta in orbita solmente pro alicun menses), illo ha essite progressivemente assemblate in le spatio in plure missiones, e es alimentate electricamente per pannellos photovoltaic.


Le station spatial international (clicca pro aggrandir)

Etichette: ,