sabato 28 aprile 2012

Relocation

Al initio de april nos moveva nostre domicilio de Lauttasaari, que es in le municipalitate de Helsinki, a Viertola, in le municipalitate de Vantaa. Vos pote leger multe informationes utile super Viertola in su pagina de wikipedia — si vos comprende le finnese, naturalmente. :-)

Certemente io e Yulia esseva triste de lassar nostre amate insula, e specialmente le scuriolo que sovente io poteva admirar del finestra de mi officio; ma le parve apartamento (e le costos prohibitive de apartamentos plus grande in le mesme region) mal se conjuga con le planos de aggrandimento de nostre familia. Le nove casa, que Yulia ha promittite de describer in futuro in su blog, es capace de hospitar usque a 2000 personas con un densitate simile a isto, si on plena le sauna e le banios. Isto me da bastante spatio pro laborar in un camera totalmente mie, al minus usque le resto del familia non va reclamar lo.
Viertola forsan non es tanto belle como Lauttasaari, ma certemente il ha su fascination. In loco del mar, nunc nos ha un rivo; in loco del scuriolo, nos ha aves con un belle canto, e io anque audiva un pico; il ha bastante de locos pro promenar se in le natura, e parve arbores cresce durante que io scribe:

De mi casa, io pote attinger le centro de Helsinki in 35-40 minutas (autobus plus traino) e le aeroporto in 20 minutas. Le botecas es a un kilometro de distantia; non tanto proxime como antea, ma pro un persona que labora sempre claudite in un camera de su casa, un parve promenada de tempore in tempore certamente non va facer mal.


In cambiar completemente subjecto, io vos informa que io ha create un nove blog dedicate exclusivemente a mi activitate photographic: photoblog.mardy.it. Nunc illo es solmente un copia del contento photographic de iste blog, ma illo devenira melior in futuro. Iste blog, que vos lege nunc, continuara como illo es: a parlar de me, de mi viages, de programmation e anque de photographia; le differentia es que photo.mardy.it tractara solmente de photographia.

Etichette: ,

0 Commenti:

Posta un commento

Iscriviti a Commenti sul post [Atom]

<< Home page